రైతన్నల ఆశలు ఆవిరేనా..!

రైతన్నల ఆశలు ఆవిరేనా……!

• నాలుగు సొసైటీల రైతులకు వర్తించని రుణమాఫీ..
• సొసైటీలకు ఎస్​బీఐ ద్వారా ఫైనాన్సింగ్​ చేసుకోవడమే పాపం
•  ఆందోళనలో 4065మంది రైతులు
• రూ.12.59కోట్లు రుణమాఫీపై సందిగ్ధత
• తమకు కూడా వర్తింపజేయాలని ప్రభుత్వానికి రైతుల వేడుకోలు
  ములుగు జిల్లా ప్రతినిధి,(అక్షర సవాల్): 
  తెలంగాణ రాష్ర్ట ప్రభుత్వం ద్వారా రైతులకు రూ.2లక్షల రుణమాఫీ వర్తింపజేస్తూ తెలంగాణ ముఖ్యమంత్రి ఎనుముల రేవంత్​ రెడ్డి పథకం ప్రారంభించారు. అయితే ములుగు జిల్లాలోని మూడు ప్రాథమిక వ్యవసాయ సహకార సంఘాలు, భూపాలపల్లి జిల్లాలోని ఒక పీఏసీఎస్ పరిధిలోగల​ రైతులు రుణమాఫీకి నోచుకోవడంలేదు. ములుగు జిల్లాలో ఇతర పీఏసీఎస్​ ల పరిధిలోని 12906మంది రైతులకు రుణమాఫీ వర్తింపజేస్తూ జిల్లా అధికార యంత్రాంగం జాబితా విడుదల చేసింది. అయితే ఆ నాలుగు సొసైటీలకు ఎస్​బీఐ ఫైనాన్సింగ్​ చేయడం, సదరు బ్యాంకు అధికారులు రుణపంపిణీ, రెనివల్​ చేయకపోవడంతో 4065మంది రైతులు రూ.12.59కోట్లు నష్టపోతున్నారు. ఈవిషయంపై సొసైటీ చైర్మన్లు, సీఈవోలు కలెక్టర్​ ద్వారా ముఖ్యమంత్రి రేవంత్ రెడ్డికి విన్నపాలు చేశారు.
•  నాలుగు సొసైటీల రైతులకు రుణమాఫీ లేదు..

ములుగు జిల్లా ములుగు మండలం ఇంచర్ల ప్రాథమిక వ్యవసాయ సహకార సంఘంతోపాటు వెంకటాపూర్​ మండలం పాలంపేట, లక్ష్మీదేవిపేట పీఏసీఎస్​, భూపాలపల్లి జిల్లా గణపురం మండల కేంద్రంలోని పీఏసీఎస్​లకు ములుగులోని ఎస్​బీఐ బ్యాంకు ద్వారా రుణసదుపాయం కల్పిస్తున్నారు. ఇంచర్ల పీఏసీఎస్​ పరిధిలో 421, పాలంపేటలో 395మంది, లక్ష్మీదేవిపేటలో 295మంది, గణపురం పీఏసీఎస్​ పరిధిలో 2954మంది మొత్తంగా 4065మంది రైతులు ఉన్నారు. అయితే ప్రస్తుతం తెలంగాణ ప్రభుత్వం డిసెంబర్​ 12, 2018 నుంచి 09 డిసెంబర్​ 2023 కటాఫ్​ తేదీని నిర్ణయించేవరకు ఈ సొసైటీల పరిధిలోని రైతులు నష్టపోతున్నారు. రాష్ట్రంలో కమర్షియల్​ బ్యాంక్​ రుణసహాయం పొందే జాబితాలో (సీడెడ్​ సొసైటీలు) ఈ నాలుగు సొసైటీలు ఉండటం వీరికి శాపంగా మారింది.

•  ఎస్​బీఐ ఫైనాన్షియల్​ పరిధిలో ఉండడమే శాపమా..?
  నాలుగు సొసైటీల పరిధిలోని 4065మంది రైతులకు 2018 డిసెంబర్​ నుంచి రుణపంపిణీ చేయకపోవడం, రుణాలకు రెన్యువల్ చేయకపోయే సరికి ఈ పరిస్థితి ఏర్పడింది. ఆయా సొసైటీల చైర్మన్లు, సీఈవోలు బ్యాంకు అధికారులకు పలుమార్లు విన్నవించినా పట్టించుకోలేదని అధికారులకు విన్నవించారు. ఎన్​సీఎల్​ గురించి ఎస్​బీఐ శాఖ అధికారులకు పలుమార్లు ఫిర్యాదులు చేసినా ఆయా పీఏసీఎస్​ లలోని రైతుల ఆర్థిక అభివృద్థికి సహకరించలేదు. దీంతో ప్రభుత్వం నిర్ణయించిన కటాఫ్​ తేదీకి సొసైటీల రైతులు తీవ్రంగా నష్టపోతున్నారు. ఇంచర్ల పరిధిలో రూ.కోటి 24లక్షలు, పాలంపేట పరిధిలో రూ.కోటి 35లక్షలు, లక్ష్మీదేవిపేట రూ.81లక్షలు, గణపురం రూ.9కోట్లు మొత్తంగా సుమారు రూ.12.59కోట్లకు పైగా రైతులకు రుణాలు మాఫీ కావడంలేదని సొసైటీ చైర్మన్లు చెబుతున్నారు. ఈ విషయంపై జిల్లా కలెక్టర్​ తోపాటు సంబంధిత శాఖల కమిషనర్లకు విన్నవించామని సొసైటీ పాలకవర్గం తెలిపారు. ప్రభుత్వం స్పందించి తమకు న్యాయం చేయాలని రైతులు కోరుతున్నారు. రుణమాఫీ జరిగితే ఆమొత్తం పెట్టుబడికి సాయంగా ఉంటుందని పేర్కొంటున్నారు.
•  కటాఫ్​ తేదీతో నష్టపోతున్నాం : జినుకల కృష్ణాకర్​, రైతు, జంగాలపల్లి (ఇంచర్ల పీఏసీఎస్​)

ప్రభుత్వం రుణమాఫీ ఇస్తోందని సంతోషపడ్డాం. రుణమాఫీ ద్వారా నేను కట్టాల్సిన రుణం మాఫీ అయితే ఆ సొమ్మును పెట్టుబడికి ఉపయోగించుకోవచ్చని సంబుర పడ్డాను. అయితే ఇంచర్ల పీఏసీఎస్​ కు రుణమాఫీ వర్తించదని తెలిసే సరికి తీవ్ర ఆందోళనలో ఉన్నాము. కుటుంబమంతా కష్టపడితే తమకు దక్కే ఫలితం తక్కువ. రుణమాఫీతో అయినా ఈసారి పంటలు బాగా పండించుకునేందకు పెట్టుబడి రూపంలో పెడదామంటే తమకు వర్తించకపోవడం నిరాశే మిగిలింది.

•  తమకు రుణమాఫీ వర్తింపజేయాలి : తండ నగేష్​, రైతు, లక్ష్మీదేవిపేట పీఏసీఎస్​

ప్రభుత్వం ద్వారా రుణమాఫీ లబ్ధి తమ పీఏసీఎస్​ కు కూడా వర్తింపజేయాలి. ఎస్​బీఐ బ్యాంకు అధికారులు చేసిన తప్పిదానికి తాము నష్టపోవాల్సిన పరిస్థితి నెలకొంది. మొత్తం 295మంది రైతులకు మా పీఏసీఎస్​ పరిధిలో నష్టం జరుగుతోంది. ప్రభుత్వం పునరాలోచించి తమకు రుణమాఫీ పథకం వర్తించేలా చర్యలు తీసుకోవాలి రుణమాఫీతో నిరుపేద రైతులకు ఊరట లభిస్తుంది.